నేను రైల్వే లో జాబ్ చెయ్యాలి అనే అమ్మ కోర్కెను తీర్చిన బాబా వారు…..గోపాలకృష్ణ

నా పేరు గోపాలకృష్ణ. మేము హైదరాబాద్ వనస్థలిపురంలో నివాసం ఉంటున్నాము.

నేను సౌత్ సెంట్రల్ రైల్వే లో ఉద్యోగం చేస్తున్నాను. బాబా గురించి చెప్పాలంటే ప్రతి మనిషి యొక్క జీవితమనే పుస్తకంలో, ప్రతి పేజీలో బాబా (భగవంతుడు) యొక్క సంతకం ఉంటుందన్న ప్రత్యక్ష నిదర్శనమే నేను.

నాకు బాబా గురించి తెలియపరిచిన వ్యక్తి మా అమ్మగారు. మా ఇంట వేంకేటేశ్వరస్వామి, కృష్ణుడి పూజలు చేస్తూండేవారు.

మా తాత గారు బాబా పూజలు చేస్తూండేవారు. అందువలన మా అమ్మకి బాబా బాగా తెలుసు.

అమ్మ కాపురానికి వస్తూ, కూడా బాబా ఫోటో ఒకటి తెచ్చుకుంది. మా ఇంటికి వచ్చాక ఆవిడ గురువారాలు బాబా పూజ చేసి మాకు ప్రసాదాలు పెడుతుండేది.

నేను తొమ్మదవ తరగతో, పదోవ తరగతో చదువుతున్నప్పుడు మా బాబాయి గారి ఆఫీస్ వారంతా కలిసి తుల్జాపూర్, షిరిడి ట్రిప్ వేసుకున్నారు.

ఆ సమయంలో మా బాబాయి ” గోపీ! ఒక సీట్ ఖాళీగా ఉంది. నువ్వు షిరిడి కి వస్తావేమిరా?” అంటూ అడిగారు. సాయిబాబా షిరిడీలో ఉంటారు అని తప్ప నాకింకేమీ తెలియదు.

అన్ని సంవత్సరాల నుంచి అమ్మ! బాబా పూజలు చేస్తున్నా కూడా ఎప్పుడూ ఆమె షిరిడి కి వెళ్ళలేదు, బాబా దర్శనం చేసుకోలేదు. నేను మొదటి సారిగా 1983 లో పండరీపురం చూసుకొని షిరిడికి, వేళ్ళడం జరిగింది.

ఆ నాటి షిరిడి, బాబా దర్శనం, ఒక మధుర జ్ఞాపకంలాగా అయింది. ఎందుకంటే ఇప్పుడు ఇప్పుడుండేటువంటి ఆంక్షలు, ఆనాడు లేవు. బాబాని దగ్గరగా వెళ్లి పాద సేవనం చేసుకునే భాగ్యం ఆనాడు ఉంది. ఈనాడది లేదు.

నేను చిన్నతనం నుండి తాత ప్రేమను చవిచూడలేదు. అందుకని నేను బాబాని తాత అంటాను నేనాయనకు వారసుడని.

నేను ఇంటర్ చదువుతున్నప్పుడు ఒక సారి బాగా జ్వరం వచ్చింది. మధ్యాహ్నం 12 గంటలప్పుడు ఇంట్లో హాల్లో సోఫాలో పడుకున్నాను. అమ్మ మాత్రం వంటింట్లో పని చేసుకుంటోంది. ఇంట్లో ఇంకెవరూ లేరు.

నేను ఆనాటి వరకు బాబాని ఇది కావాలి అంటూ ఏదీ అడగలేదు, కానీ ఆ రోజు మాత్రం పైన గోడలమీద ఉన్న బాబా ఫోటోని చూస్తూ ”నువ్వు నా తాతవిగా! మరి నా కోరిక నువ్వు ఎలా తీరుస్తావో చూస్తాను. ఈ రోజు షిరిడి నుండి నీ ”ప్రసాదం”, ”ఊదీ” రావాలి, అదీ నా చేతికి రావాలి”, అని అనుకున్నాను.

సాయంత్రం 6 గంటలవుతున్నప్పుడు నాన్న ఇంటికి వచ్చి, నా జ్వరం సంగతి అడిగి తెలుసుకుని, ”ఇదిగోరా! షిరిడి ప్రసాదం, విభూది” అంటూ నా చేతిలో పెట్టాడు.

నేను చాలా ఆశ్చర్యపోయాను. మధ్యాహ్నం 12 గంటలకి నేను అనుకున్నాను. ఇది ఎలా వచ్చింది అంటూ నాన్నని అడిగితే ,

ఆయన ”మా కొలీగ్ స్నేహితుడు ఒకాయన షిరిడి వెళ్లి, మా కొలీగ్ కి ప్రసాదం తీసుకువచ్చి ఇస్తూ, పక్కనే ఉన్న నాకు కాస్త ఇచ్చాడు” అని చెప్పాడు.

నేను ప్రసాదం షిరిడి నుండి రావాలనుకున్నందుకు ఇది ఇలా జరగడం నాకు విస్మయం కలిగించింది.

బాబాను మనం కోరిక కోరితే అదీ తక్షణం నెరవేరుతుందని అనిపించింది.

నెమ్మదిగా నేను P . G వరకూ చదివాను. మా అమ్మగారికి నేను రైల్ వేస్ లో జాబ్ చెయ్యాలని కోరిక అందువలన నేను రైల్వేస్ లో ఎగ్జామ్స్ రాసాను, పాసయ్యాను.

ఇంటర్వ్యూ కి పిలిచారు. ఫలానా రోజున రమ్మనమని లెటర్ వచ్చింది.

ఇంటర్వ్యూ ఎలా జరుగుతుందో తెలియదు. అమ్మ అప్పటికే నాకు ఉద్యోగం వస్తే తను రోజూ బాబాకి నైవేద్యం పెట్టి పూజ చేస్తాను అని అనుకుంది.

నేను ఇంటర్వ్యూలో ఏమి సరిగ్గా చెప్పలేకపోయాను. నేను బయటికి రాగానే ”ఎలా చేసావు? అంటూ నాన్న అడిగారు.” నేను సరిగ్గా చేయలేదు” అని చెప్పాను.

ఆయన నన్ను సరిగ్గా ఇంటర్వ్యూ చేయనందుకు బాగా తిట్టారు. నాన్న తిట్టాక నేను బాబాతో అనుకున్నాను, ”బాబా నువ్వే ఇక్కడిదాకా తీసుకువచ్చావు, ఆపై కూడా నువ్వే ఏదో ఒకటి చెయ్యి” అని అనుకున్నాను.

ప్రపంచంలో మనిషి అనేవాడు మొట్టమొదట మోకరిల్లింది భగవంతుడికి, ఆయన చరణాల వద్ద నిలబడ్డాను.

ఈ రోజు నువ్వు నాకు ఆ ఉద్యోగం ఇప్పిస్తావా లేదా అంటూ రెండు చీటీలు వేసి తీసాను. అందులో ఉద్యోగం వస్తుంది అని వచ్చింది.

ఇంటర్వ్యూలు జరిగి దాదాపు 18 నెలలు అయ్యాయి, ఎటువంటి సమాచారం లేదు. ఆ తర్వాత నేను చాలా ఇంటర్వ్యూ లకి వెళ్ళాను. అయితే నాలో ఏదో తెలియని వెలితి అంటూ ఉండేది.

రోజులు గడిచిపోతున్నాయి, నేను బాబా ముందు కళ్ళనీళ్ళతో నిలబడుతుండేవాడిని.

18 నెలల తర్వాత ఒక రోజు నేను సెలెక్ట్ అయినట్లు, మెడికల్ చెకప్ కి రమ్మనమని లెటర్ వచ్చింది.

విజయవాడలో అది జరిగింది. నాకు ముక్కు మొఖం తెలియని వాళ్ళు రిఫరెన్స్ సంతకాలు చేసారు, అదంతా బాబా దయ.

నాకు స్టేషన్ మాస్టర్ గా ఇప్పగూడ లో పోస్టింగ్ ఇచ్చారు. ఆ తర్వాత నాకు వివాహం అయింది.

పెళ్లి అయిన తర్వాత మేము హనీమూన్ కి అంటూ వేరే ఎక్కడికో కాకుండా ”షిరిడి” కి వెళ్ళాము.

అక్కడ దత్తాత్రేయుడి గుడి ముందు నాకు బాబా ఒక ఆడ శిశువుని చూపించాడు.

అప్పుడే నా భార్య శ్రావణికి నేను మనకి ముందు అమ్మాయి పుడుతుందని బాబా నాకు చూపిస్తున్నారని చెప్పాను.

 అలాగే ముందు అమ్మాయి పుట్టింది, తర్వాత అబ్బాయి పుట్టాడు.

The above miracle has been typed by: Mrs. Raja Rajeswari Sainathuni

Latest Miracles:

• నవ గురువారం వ్రతం చేసుకోవాలి అని సంకల్పించిన భక్తురాలి కోర్కెను తీర్చిన బాబా వారు
• సొంత ఇంటి కోర్కెను తీర్చిన బాబా వారు.
• కంప్యూటర్ అవగాహన ఏమాత్రం లేని నాకు GE కంపెనీ లో జాబ్ ఇప్పించిన బాబా వారు.
• తొలిసారి ఒంటరిగా షిరిడి వెళ్ళిన నాకు, ఎటువంటి ఇబ్బంది లేకుండా చేసిన బాబా వారు
• బాబా అడిగి చెల్లించుకున్న దక్షిణ వైనం!!–Audio