అందరి కంటే గొప్ప వైద్యుడైన శ్రీ సాయికి సాధ్యం కానిది ఏముంది?

అఖిలాండకోటి బ్రహ్మండనాయక రాజది రాజ యోగిరాజా పరబ్రహ్మ శ్రీ సచ్చిదానంద సద్గురు సాయినాథ్ మహారాజ్ కి జై

సాయి బంధువులారా మరియు దివ్యాత్మ స్వరూపులారా అందరికీ సాయి శుభాశీస్సులు

ఈ పవిత్ర భారతావనిలో ఇంతవరకూ అవతరించిన దివ్య పురుషులందరిలోనూ శ్రీ శిరిడీ సాయినాధులది ఒక విశిష్టమైన అవతారం.

భక్త జన సంరక్షణే తన అవతార కార్యం గా భావించే శ్రీ సాయి స్మృతి మాత్ర ప్రసన్నులు. భక్తులు సర్వశ్య శరణాగతి ఒనరించి, భక్తి శ్రద్ధలతో ప్రేమ పూర్వకం గా “సాయి” అని పిలుస్తే చాలు , సత్వరం “ఓయీ” అని పలికి , ఆపన్న హస్తం అందించి, ఎల్లవేళలా తోడూ నీడగా నిలుస్తారు. 

శ్రీ సాయినాధులను తమ జీవితమనే నౌకకు చుక్కాని గా చేసుకున్న వారికి అన్ని చింతనలు, ఆందోళనలు, బాధలు, సమస్యలు ఆమడ దూరం లో వుంటాయి. జీవితం లో ఎదురయ్యే అన్ని సమస్యలకు శ్రీ సాయి పాదాలను శరణు వేడడం ఒక్కటే పరిష్కారం. తనను నమ్ముకున్న అశేష భక్త జనావళికి శ్రీ సాయి ఏ విధం గా బాసట గా నిలిచి రక్షించారో ఈ క్రింది లీల ద్వారా తెలుసుకుందాము.

మహారాష్ట్రా లోని అకోలా గ్రామంలో నివసించే ఒక వైశ్యునికి లేక లేక ఒక ఆడపిల్ల పుట్టింది. వారు ఆ అమ్మాయిని ఎంతో అల్లారు ముద్దుగా పెంచుకోసాగారు. దురదృష్ట వశాత్తూ ఆ అమ్మాయికి ఒక విషపు జ్వరం సోకి రెండు కాళ్ళూ చచ్చుబడి పోయాయి. లేచి నిలబడ లేక ఆ అమ్మాయి మంచానికే పరిమితమైపోయింది.

ఎంత మంది ప్రముఖ వైద్యుల చేత ఖరీదైన వైద్యం ఇప్పించినా ప్రయోజనం లేక పోయింది. అంతలో ఆవైశ్యుల కుటుంబానికి తెలిసిన వారు వచ్చి రోగ నివారణార్ధం శిరిడీ లోని సాయిని శరణు పొందమని సలహా ఇచ్చారు.

ఆఖరు ప్రయత్నం గా ఆ వైశ్యుడు తన కుమార్తెను శిరిడీకి మోసుకు వచ్చి శ్రీ సాయి కాళ్ళ వద్ద వుంచాడు. తన కుమార్తెకు స్వస్థత చేకూర్చమని హృదయపూర్వకం గా ప్రార్ధించాడు. 

దయామయుడైన శ్రీ సాయి ఆమెను ఆశీర్వదించి కొద్ది రోజులు శిరిడీలోనే వుండమన్నారు. ఆశ్చర్యాలలోకెల్లా ఆశ్చర్యం! ఆ రోజు నుండే ఆమె కాళ్ళలో కదలికలు ప్రారంభమయ్యాయి. మూడవ రోజు కల్లా ఆమె ఎవరి సహాయం లేకుండా నడవ సాగింది. వారం రోజుల లోపే పరుగులు తీసే శక్తి లభించింది.

అందరి కంటే గొప్ప వైద్యుడైన శ్రీ సాయికి సాధ్యం కానిది ఏముంది? 

సర్వం సాయినాథర్పాణమస్తు 

ప్రియమైన సాయి భక్తులకు ఒక మనవి. బాబా తో మీకు జరిగిన అనుభవాలను మాతో పంచుకో గలరు
మా ఈమెయిలు: saibabaleelas@gmail.com

Latest Miracles:

• Sree Sai Bhakta Anubhava Samhitha (శ్రీ సాయి భక్త అనుభవ సంహిత )
• తనను నమ్మి కొలిచే భక్త జనావళిని శ్రీ సాయి సురక్షితం గా ఈ భవ సాగరాన్నిదాటిస్తారు
• శివ ప్రియ సాయికి ప్రియంగా మారింది.
• శిరిడి యాత్రకు బాబా ధన సహాయం
• బాబా నిన్ను గొడుగు పట్టి ఇక్కడకు తీసుకు వచ్చారు. ఎవరినీ ఏమి అడగకు….శ్రీ సాయినాథుని శరత్ బాబూజీ