ఏకత్వం ….. సాయి@366 ఫిబ్రవరి 27….Audio

Sai Baba ... Sai Baba ... Sai Baba ... Sai Baba (click here)

Those who chant my name repetedly, I will protect them always...Sai Baba

Voice Support By: Mrs. Jeevani

సాయిబాబా ఫిబ్రవరి 27, 1912న ఒక గాథను చెప్పారు.

”సాయిబాబా తామొక పొలంలోకి వెళ్ళామని, అక్కడ పెద్ద చిలకలు ఉన్నాయని చెప్పారు. వారు అక్కడ ఉండటంతో అవి చెదరిపోయాయట” అని.

చిలకలు ఎందుకు ఎగిరిపోయాయి? సరిగ్గా ఇటువంటి గాథే తుకారాం జీవిత చరిత్రలో చూడవచ్చు.

ఒకసారి తుకారాం ఆళంది వెళ్ళాడు. జ్ఞానేశ్వరుడు సమాధి చెందిన పుణ్య ప్రదేశం అది.

ఆళంది వెళ్ళగానే ఈ సృష్టికర్త అయిన భగవానునికి వందనం చేశాడు.

అక్కడ అప్పుడు అజాన్‌ వృక్షంపై ఉన్న పక్షులు తమ ముక్కులతో పండ్లను తింటున్నాయి. తుకారాంను చూడగానే అవి ఎగిరి పోయాయి.

తుకారాం విషణ్ణుడయ్యాడు ”ఏమిటి నేను షడ్రుచులను జయించాను.

నా మనసు తేడా అనేదేది తెలియని స్థితిలో ఉన్నది. నేను శరీరపు ఇచ్ఛ వీడి శవంలా జీవిస్తున్నాను.

ఇదంతా వృథాయేనా? బ్రహ్మజ్ఞానంతో ఈ శరీరాన్ని దగ్ధం చేసుకున్నాను.

ఈ శరీరం ఎవరిదో వారికి అప్పగించాను. నాలో పాండురంగని కృపచే దివ్య జ్యోతి వెలిగింది.

అయినా పక్షులు చూచి వెళ్ళిపోయాయి. నేను సాధించినది నిరర్ధకమేనా?” అని ఎంతో వ్యాకులపడ్డాడు.

”ఓ! పాండురంగా! నీవే నన్ను కాపాడాలి” అని ధ్యానం చేశాడు.

”పక్షులు మరల భయంపోయి తిరిగి వచ్చినప్పుడే నాకు నిష్కృతి” అని తలచి చేనులోని దిష్టి బొమ్మలా చేష్టలుడిగి నిలబడి పోయాడు.

నిమిషము, రెండు నిమషాలు కాదు – గాలిని కూడ మరచాడు. ఆ స్థితిలో దాదాపు గంటన్నర ఉండి పోయాడు.

శ్యామసుందరునకు ఈ విషయం తెలియదా? ఇక పక్షులు బిల బిల లాడుతూ తుకారామునిపై నిలచాయి నిర్భయంగా. తుకారామునకు సంతోషం కలిగింది.

తన శరీరాన్ని అటు ఇటు త్రిప్పాడు. పక్షులు చెదరలేదు, కదల లేదు. ఎందుకంటే పక్షులు గాలివాన వచ్చినా ఆశ్రయ మిచ్చిన చెట్టు నుండి కదలవు గదా!

అదే విధంగా అవి తుకారాముని అంటిపెట్టు కున్నాయి. చరా చర జగత్తు అంతా తానే అని భావించే వానికి దేనిని గూర్చి భయం ఉంటుంది? ఏవి భయపడతాయి!

ఇక్కడ తెల్పేది ఒకటే – మన మనస్సును కల్మష రహితం చేసుకుందాం. అది చాలు. సాయి మనసు వలె, తుకారాం మనసు వలె మన మనసులను మార్చుకుందాం.

ఏకత్వం అర్థం కాని పక్షులు పారిపోవచ్చు, ఏకాత్మ భావంతో నిండిపోయిన వారికి సర్వము ఒకటే!

Compiled By:- ముళ్ళపూడి పాండురంగ సాయినాథ్ & మున్నలూరి బోస్

Collected and Presented By: Mr:Sreenivas Murthy

Those who chant my name repetedly, I will protect them always...Sai Baba